Выбрать язык
Выбрать рассказ Ветхого Завета
Выбрать рассказ Нового Завета
Назаретым коден, Иисус Капернаум олашке илаш куснен. Тиде жап гыч Тудо увертарен туныкташ тӱҥалын. Тудо ойлен: «Языкым касарыктен, Юмо деке савырныза: Пылпомыш Кугыжаныш лишемын». Почешыже тӱрлӧ верла гыч шуко калык коштын. Иисус нуным туныктен, черлыштым паремден.
Чыла вере пеленже лийышт манын, Иисус Шкаланже латкок тунемшым ойырен налын. Нуным посна туныктен. Тудо нуным увертарен каласкалаш колтынеже улмаш, нунылан черлым паремдаш да иям поктен лукташ властьым пуаш шонен.
Икана тыге лийын: «Галилей теҥыз воктеч кайымыж годым Тудо кок изак-шолякым, Петр манме Симоным да тудын Андрей шольыжым, ужын. Нуно колызо лийыныт, тиде жапыште вапшыштым вӱдыш кышкеныт. Иисус нунылан ойлен: ”Почешем кайыза, Мый тендам айдеме кучышым ыштем”. (Вес семынже, Иисус нуным сулык деч кораҥдыме да айдемым чын корныш лукмо пашалан туныктымыж нерген ойлен.) Нуно тунамак вапшыштым коденыт да Иисус почеш каеныт. Тушеч умбакырак ошкылмеке, вес кок изакшолякым, Зеведейын Иаков ден Иоанн эргыж-влакым ужын. Нуно ачашт дене пырля пушышто лийыныт да вапшыштым ачаленыт. Иисус нунымат ӱжын. Нуно тунамак пушыштым, ачаштым коденыт да Иисус почеш каеныт».
Тунемше-влакын лӱмышт тыгай лийын: Симон – Иисус тудым Петр манын лӱмден, Зеведейын Иаков эргыже, тудын Иоанн шольыжо, Андрей, Филипп, Варфоломей, Матфей, Фома, Иаков – Алфейын эргыже, Фаддей, Симон Кананит да Искариот манме Иуда. Чыла нине тунемше-влак калык кокла гыч лекше тыглай еҥ лийыныт. Иисус ӱжмеке, нуно вигак Тудын дене пырля каеныт.
78 