Выбрать язык
Выбрать рассказ Ветхого Завета
Выбрать рассказ Нового Завета
Вӱд ташлымаш шӱдӧ витле кече шуйнен. Вара вӱд эркын-эркын пучаш тӱҥалын. Нойын ковчегше ийын коштмым Арарат курык кундемыште чарнен.
Нылле кече эртымек, Ной ковчег окнам почын да вӱд пучымо нерген пален налаш курныжым луктын колтен. Курныж мӧҥгеш пӧртылын огыл, мланде кошкымешке, тышке-тушко чоҥештылын. Вара кӧгӧрченым колтен. Кӧгӧрчен, шинчаш верым муын огылат, мӧҥгеш ковчегыш чоҥештен толын. Вӱд алят пучен огыл. Шым кече гыч Ной адакат кӧгӧрченым луктын колтен. Изиш лиймеке, кӧгӧрчен умшашыже нӧргӧ лышташым конден. Тыге Ной мланде ӱмбалне вӱд пучымым пален налын. Адак шым кече эртымеке, Ной кӧгӧрченым уэш колтен. Тиде гана кӧгӧрчен мӧҥгеш пӧртылын огыл. Тунам Ной, ковчег леведышым почын, тӱжваке ончалын. Тудо кукшо мландым ужын.
Юмо Нойлан каласен: «Ватет, эрге-шешкыч-влак дене пырля ковчег гыч лек, пырля налме чыла чонаным эрыкыш колто. Тек нуно мланде мучко шарлат, игым ыштат да тукымыштым шарат».
16 