Выбрать язык
Выбрать рассказ Ветхого Завета
Выбрать рассказ Нового Завета
Авраамын эргыжым Исаак манын лӱмденыт. Кушкын шумекше, тудын Иаков лӱман эргыже шочын. А варажым Иаковын латкок эрге да ик ӱдыр шочшыжо лийын. Иосиф лӱман эргыжым Иаков поснак йӧратен.
Икана Иосиф омым ужын. Пуйто тудо изаж-влак дене пырля пасушто кылтам пидеш. Иосифын пидме кылтаже тура шогалеш, а изаж-влакын кылташт чыланат, йыр шогалын, тудын кылтажлан вуйым сават. Ужмо омыжым изаж-влаклан ойлен. Нуныжо каласеныт: «Тыяк мемнам кид йымалнет кучаш тӱҥалат огыл чай?» Изаж-влак Иосифлан сыреныт.
Иосиф адак вес омым ужын: пуйто кече, тылзе да латик шӱдыр тудлан вуйым сават. Ужмо омыжым тудо адакат ачажлан да изаж-влаклан ойлен. Ачаже шылтален каласен: «Могай тиде омо? Чынже денак мыламат, тыйын ават да изат-влакланат мланде марте вуй саваш тый декет мияш кӱлеш мо?» Изаж-влак тиддеч вара Иосифлан эшеат чот кӧранаш тӱҥалыныт, а ачаже омо нерген шонкален.
Икана изаж-влакын кӱтӱ кӱташ торашке кайымекышт, ачаже Иосифым нуным ончал толаш колтен. Ачажын кӱштымыжым шукташ Иосиф кумылын каен. Изаж-влакым кычалын, тудо кужу жап коштын. Пытартышлан нуным муын. Иосифын толмыжым ужын, изаж-влак шыдешкымышт дене «Теве тудо, омо ужшет, лишемеш» маныныт. Вара тудым пушташ да иктаж-могай вынемыш кудалташ кутырен келшеныт. А ачаштлан янлык кочкын манын каласаш лийыныт. «Омыжо кузе савырна, вара ончалына!»
22 