Выбрать язык
Выбрать рассказ Ветхого Завета
Выбрать рассказ Нового Завета
Юмо казамат вуйлатышын кумылжым Иосиф велке савырен. Петырыме еҥ-влак коклаште Иосифым кугураклан шогалтеныт, да тудо чыла сомылым жапыштыже шуктымым эскерен шоген.
Икана казаматыш фараонын кок тарзыжым конден петыреныт. Иктыже – фараонын арака темкалышыже, весыже – кинде пыштышыже лийын. Нине кок еҥ казаматыште омым ужыныт. Омышт мом ончыктымым пален огытылат, пешак тургыжланен шинченыт. Иосиф нунын деч омыштым каласкалаш йодын. Тудо пален: Юмо омым умылтараш полшен кертеш.
Ондак арака темкалыше ойлен. Тудо омешыже кум укшан виноград вондым ужын. Укшлаштыже пеледыш-влак пеледыныт, виноград саскашке савырненыт. Вара тудо пуйто фараонын коркашкыже саскан вӱдшым темден луктын да тудлан йӱашыже пуэн. Иосиф тунамак каласен: «Кум укшыжо – тиде кум кече. Кум кече гыч фараон тыйым мӧҥгеш шке декше пӧртылта да ончычсо верешак кода».
Вара шке омыжым кинде пыштыше каласкален. Тудлан вуешыже ӱмбала шындыме кум киндерке кончен. Кӱшыл киндеркыштыже фараонлан руаш дене кӱэштме тӱрлӧ кочкыш лийын. Тиде сийым кайык-влак чӱҥгеныт. Омым Иосиф тыге умылтарен: «Кум киндерке – тиде кум кече. Кум кече гыч фараон вуетым руал шуа, а капетым пушеҥгеш сака. Тушто капетым кайык-влак чӱҥген пытарат».
Чылажат Иосифын ойлымыж семынак лийын.
Тӱҥалтыш (Бытие) 39:21-23; 40:1-22
28 