Выбрать язык
Выбрать рассказ Ветхого Завета
Выбрать рассказ Нового Завета
Икана фараон омым ужын: эҥер гыч шым коя ушкал лектын, омыж коклаш пурен. Почешышт явыген пытыше вес шым ушкал лектын да коя ушкал-влакым кочкын. Фараон помыжалт каен. Уэш мален колтымекше, вес омым ужын: ик вургеш пеш лӧза да тичмаш шым шурнывуй шочын. Тиддеч вара адак шым шурнывуй шочын. Нинышт моткоч вичкыж, начар да кошкышо лийыныт. Нуно лӧза да тичмаш шурнывуй-влакым кочкын колтеныт. Эрдене фараон моткоч каньысырланен. Арака темкалыше фараонлан Иосиф нерген ойлен. Фараон Иосифым шке декше кондаш кӱштен да каласен: «Тый омым умылтарен моштет манын колынам». Иосиф вашештен: «Мый шке ом мошто, а Юмо фараонлан кӱлеш вашмутым пуа». Фараонын омыжым колыштмеке, Иосиф манын: “Египетыште шым ий кинде сайын шочеш. Вара шым шужен ий толеш”. Иосиф фараонлан Египетыште озанлык пашам виктараш ушан еҥым шогалташ темлен. Шурно сайын шочшаш шым ий годым кинде шапашым ышташ ойым пуэн.
Омым тыге раш умылтарымаш фараонлан моткоч келшен. Тудо Иосифлан каласен: «Тыланет чыла тидым Юмо увертарен. Тыйын гай ушан да шонен моштышо иктат уке. Тый мыйын озанлык виктарышем лият. Тек мутетым чыла калыкем колыштеш. Тый дечет кугурак мый гына лиям». Тыге манмеке, тамга шергашыжым кудашын, фараон Иосифын парняшкыже чиктен, шергакан вургемым пуэн, шӱйышкыжӧ шӧртньӧ шинчырым сакен. Египет мучко тудым кокымшо орвашкыже шынден коштыкташ шӱден. Тыге Иосифын лӱмжӧ кӱшкӧ нӧлталтын. Тудо пашалан пижын, Египет калык шужен ынже коло манын, поян кинде лектышан ийла годым кугу шурно аныкым ыштен.
30 