Выбрать язык
Книги Ветхого Завета
Книги Нового Завета
с русским текстом1 О, умылыдымо галат-влак, кӧ тендам чын деч кораҥаш ондален таратен? Шинча ончылныда Иисус Христос тендан дене пудален сакыме [гаяк] сӱретлалтын.2 Тендан деч тидым гына пален налнем: законым шуктымо дене те Юмын Шӱлышым налында мо але колмо уверлан ӱшаныме дене?3 Тунарак те умылыдымо улыда мо? Шӱлыш дене тӱҥалында, а ынде кап да чон дене мучашледа?4 Арамак мо те тынар шуко чытенда? Уке, арам огыл, шонем.5 Юмо тыланда Шӱлышым пуа да тендан коклаште чудым ышта. Тидым Тудо законым шуктымыланда кӧра мо ышта – але колмо уверланда ӱшанымылан кӧра?
6 Авраам денат тыгак лийын: «Тудо Юмылан ӱшанен, сандене Юмо тудым чын ыштышылан шотлен».*а7 Тугеже палыза: ӱшанымашлан эҥертыше-влак Авраамын шочшышт улыт.8 Вес калык гыч улшо еҥ-влакым Юмо ӱшанымыштлан кӧра чыныш луктеш. Тидым Возымаш ончык ужын да Авраамлан «Тыйын гоч калык-влак чылан суапландарыме лийыт»*б манын, поро уверым ончылгоч увертарен.9 Тыгеракын, ӱшанымашлан эҥертыше-влак ӱшаныше Авраам дене пырля суапландарыме лийыт,10 а законым шуктымылан эҥертыше-влак ӱмбалне – каргымаш.
Вет возымо: «Закон книгаш возымым кӧ чылажымат шуктен ок шого, кеч-кӧат каргыме лиеш».*в11 А закон гоч нигӧ Юмын ончылно чыныш ок лек, тиде раш, вет «чын ыштыше айдеме ӱшанымашыж дене илаш тӱҥалеш».*г12 Закон ӱшанымашлан ок эҥерте, а «кӧ законын йодмыжым шукта, тудым шуктымо дене ила».*д13 Христос мемнам законын каргымыж деч тӱлен налын. Тудо мемнан верч Шке каргыме лийын, возымо вет: «Пу меҥгеш сакыме кеч-кӧат каргыме».*е14 Сандене Авраамлан пуымо суапландарымаш вес калык-влак деке Христос Иисус гоч шуын кертеш, да ме сӧрымӧ Шӱлышым ӱшаныме дене налын кертына.
15 Иза-шольо-влак, еҥ-влакын шонкалымышт семын ойлем: айдемын пеҥгыдемдыме ойпидышымат нигӧ шӧренат да тушко нимом ешаренат ок керт.16 А сӧрымашым Авраамлан да тудын урлыкшылан пуымо. Возымаште, «урлык-влаклан» манын, шуко нерген огыл, а икте нерген «тыйын урлыкетлан» манын каласыме, тиде – Христос.*ж17 Мый тидым ойлынем: нылшӱдӧ кумло ий эртымеке лекше закон Христос нерген Юмын ондак пеҥгыдемдыме ойпидышым шӧрен да Юмын сӧрымыжын вийжым пытарен ок керт.18 Вет югыпогым налмаш законеш негызлалтеш гын, тыгеже тудо сӧрымашеш ок негызлалт. Но Юмо сӧрымыж дене Авраамлан югыпогым пӧлеклен.
19 А молан законжо кӱлеш? Тудым, сӧрымашым налше урлык толмешке, титакыш пурымылан кӧра варарак лукмо да ушен шогышын кидше дене Суксо-влак гоч пуымо.20 Но икте годым ушен шогышо огеш лий, а Юмо икте.
21 Тугеже закон Юмын сӧрымыж ваштареш шога? Уке! Вет илышым ыштен кертше закон пуалтеш ыле гын, чыныш лекмаш чынжымак закон деч лиеш ыле.22 Но мом сӧрымӧ, тудо ӱшаныше-влаклан Иисус Христослан ӱшаныме дене пуалтше манын, Возымаш чылам языкеш кепшылтен.
23 Ӱшанымаш толмо деч ончыч, шушаш ӱшанымаш почылтмешке, закон мемнам петырен кучен да оролен.24 Тыгеже, ӱшаныме дене мыланна чыныш лекташ манын, закон мемнам Христос деке виктарыше лийын.*з25 Но ӱшанымаш толмеке, ме ынде виктарышын кид йымалныже огынал.
26 Вет Христос Иисуслан ӱшанымылан кӧра те чылан Юмын шочшыжо улыда.27 Те чылан, Христос дене ушнаш манын тынеш пурышо-влак, Христос дене вӱдылалтында.28 Иудей але эллин, кул але эрыкан, пӧръеҥ але ӱдырамаш ынде уке, вет те чыланат, Христос Иисус дене ушнен, икте улыда.29 А Христосын улыда гын, тугеже те Авраамын урлыкшо да сӧрымӧ почеш наследник улыда.
*ж 3:16 Тӱҥ 12:7, 13:15, 24:7.
*з 3:24 «Закон мемнам Христос деке виктарыше лийын»: грекла возымым тыгеат умылаш лиеш: «Христос толмешке, закон мемнам виктарыше лийын».
Глава 3